Rev 11 | WSK | STEP | Nuna tam bo sikir iwita, mu melmasak ko maiya tukunang ko tom te ilumon se ariga ko, mu ani aisiman. Se kuring bo aga maonam, “Namar ale Kaem ko temple, se ko altar ko maiya tukunang mu nunga tom te to sapar, ale kariimet Kaem nup patawu se anisan mu nunga kaurko.

Revelation of John 11

Kari ilagala Kaem kuring tamon ale balmonko

1 Nuna tam bo sikir iwita, mu melmasak ko maiya tukunang ko tom te ilumon se ariga ko, mu ani aisiman. Se kuring bo aga maonam, “Namar ale Kaem ko temple, se ko altar ko maiya tukunang mu nunga tom te to sapar, ale kariimet Kaem nup patawu se anisan mu nunga kaurko. 2 Bare temple ko kar guang ko, mu ko maiya tukunang me toko. Mu awuk, kuwim umutang mu sor saki ko kariimet wore nungarman, se nuna wonong kako mu sige 42 ko eremonko. ^{▼▼Rev 11:2 Nuna wonong kako eremon karogo bagomonko: Luke 21:24; Rom 11:25.} 3 Se aninga kari ilagala aninga den balmonko mu sokel nungarik, se guang kaetam memek mu katomon, ale tom 1260 ko ningi ani agiring tamon ale balmonko.”

4 Kari ilagala mu tam olive ilagala se galep ilagala Kari Biya ali lilim la bitaruwoso wore koma dugu te sanamiwasan borta. ^{▼▼Rev 11:4: Zechariah mu tam olive ilagala se galep ko balam: 4:1-14.} 5 Se awiriya ilagala mu nunga momonko negemon, mu tama kuamili nuguring te aratuk ale kariimet umutang mu nunga lakumokko. Munan umutang te awiriya nunga bita maguwurokko negeruk mu kuerukko. 6 Se kari ilagala umutang, tom nuna Kaem kuring kariimet nunga manarmonko, se taiti kuali tuwik me tai kapurukko balmonko, mu ko sokel nuna nongote ago. ^{▼▼Rev 11:6 Moses ko tom te kilek sang uwutata aratam: Exo 7:20; 8:12. Se Elijah ko tom te 3 1/2 yar ningi tuwik me kapakaso: 1 Kings 17:1; Luke 4:25; James 5:17-18.} Ale nuna balmon se yu suen la gue ko geragukko mu ko sokel nongote agotala. Ale nuna aliti kariimet ikup memek duap duap te nunga maguwumonko mu ko sokelel nongote terong ma tala. Tom suen biya nuna uwutata betemonko nongomang baluk, mu am betemonko.

7 Nuna den balu kutuwumon, mu mel diwang mutim du biya mu ningi baga aratoso mu arungak kagerawa sail tagirok ale nunga moruk se kuemonko. 8 Se nunga nungumik guang mu wonong biya, ko duap den ira te balsan Sodom masan, Egypt masan, mu ningi ko lage te aniwomonko. Wonong borta te tala nunga Kari Biya moman se kueram. 9 Se ali sor suen biya ko kariimet, nunga den kirker, se nunga nungumik kirker, mu tom ilagala suwan se worem suwan bo ko komasang ago kari ilagala mu nunga nungumik guang aringimonko. Bare nunga mutim tugumonko mu memonko. 10 Ali imi ko kariimet suen biya mu kari ilagala kueman mu ko amilmil bita se, na inang no gi se, nunumi munan mel tumonko. Mu awuk, prophet ilagala umutang mu me kuakasan la, aliti kariimet ikup yaman biyala nungaru lagakasan.

11 Bare tom ilagala suwan se worem suwan bo ko komasang ago umutang menaram, se Kaem bur sokel ago beteram se kari ilagala mu nungumik ningi tairam, se maragaman barasu sanamaman. Se kariimet nungarkaman ale biyala nguangaman. 12 Se kari ilagala mu kuring bo duruk wonong te biyala nunga maonam se ikiman, “Ewela tai bausalko,” mam. Se kariimet nunga bita maguwuman mu nungarkiwaman se nuna taiti nuwi te eng am duruk wonong te tarigiman namaman.

13 Tom umutang te la, mu wanara biya aratam, se wonong mu ko dun sika (1/10) mu memek biyala tam. Se ko kariimet 7000 wanara mu te kua gilingiman. Se saki am bagaman mu biyala nguangakasan, ale Kaem duruk te mu ko nup patawukasan.

14 Se taraga ko kuring te ikup ilagala suwan aratukko balam mu ilagala eta aratam ale menaram. Se suwanta nukum te mu aratukko tom pingi aram.

Engel bo 7 mu ko biugel itugumam

15 Se engel 7 mu ko biugel itugumam, se kuring saki duruk wonong te mu sail ago balman:

“Ali imi ko kingdom mu aitak Kari Biya Kaem, ko Kristus ilak nunga kingdom ko aratam.
Nu tom suen biya te ali imi bituokko!”
16 Se supuling 24 Kaem koma dugu te nunga daiga kuwim te dagiwaman, mu dagulaman ale nomoke kaparam se Kaem nup patawukasan, 17 ale balukasan:

“O Kari Biya Kaem, Sokel Karogo, ni ulengkala bagakasam, aitak bagasam.
Ana ka nip patowasan ale amilmil kisisan.
Mu awuk, ni aitak ka sokel aora garagar mu te ali imi bitaruko duap betesam.
18 Ali sor sor ko kariimet ni ko ko nongomang ninguru magakaso,
bare aitak mu nika gemang magara ko tom!
Aitak mu kariimet kueman mu nunga tutera ko tom.
Aitak mu nika ura kari prophet alo,
se ka kariimet suen la, nunup ago se, nunup mena, ni nip patawu lagasan,
mu nunga koma yawara tamonko kam.
Se aking aitak mu kariimet ali sor maguwukasan mu nunga maguwura ko kam!”
Se Kaem ko temple duruk wonong te mu kuring kaigam, se Kaem ko den laili ko singir kaloman ale ningi tuguman se aniram mu wetang te aratam se arigem, mu Kaem ko den kariimet arungu nungam wore ko singir. Se pure biliwilik makaso, ale pagakaso, ale dung gururung makaso. Se wanara kapakaso. Se tuwik muguri auram ale manga bibiya iwitata tai kapakasan. ^{▼▼Rev 11:19 Singir Kaem ko den laili ningi aniram: Heb 9:4; Rev 15:5,8.}

19